16. nóvember 2011
Skrímsli í Börnum og menningu
Hausthefti Barna og menningar kemur út í vikunni. Blaðið er í þetta sinn helgað litla og stóra skrímslinu hennar Áslaugar Jónsdóttur, bókagerðarkonu, en sex bækur um þau hafa þegar komið út í samstarfi við norrænu höfundana Kalle Güettler ogRakel Helmsdal. Kristín Ragna Gunnarsdóttir teiknari og bókmenntafræðingur fjallar um myndmál í skrímslabókunum og Helga Birgisdóttir doktorsnemi í íslenskum bókmenntum tekur fyrir skrímsli og ótta. Í blaðinu er einnig viðtal við Áslaugu Jónsdóttur um tilurð litla og stóra skrímslisins og óvenjulegt samstarf þriggja höfunda. Skrímslin eru á leiðinni upp á svið Þjóðleikhússins í vetur og segir Áslaug frá því hvernig þessar loðnu verur hafa tekið í það brölt.
Af öðru efni í blaðinu má nefna grein Brynhildar Heiðar- og Ómarsdóttur um Gríshildi góðu, kvenhetju úr íslenska sagnaarfinum og nafnleysi kvennanna sem héldu þeim arfi á lofti. Þá er að vanda fjallað um nýútkomnar bækur í blaðinu ogmá þar nefna grein Guðrúnar Elsu Bragadóttur um Fluguna sem stöðvaði stríðið eftir Bryndísi Björgvinsdóttur sem hreppti Íslensku barnabókaverðlaunin á dögunum. Einnig er uppfærsla Borgarleikhússins á Galdrakarlinum í Oz leikrýnd af Sigurði H. Pálssyni.
Börn og menning, er eina íslenska tímaritið sem eingöngu fjallar um barnabókmenntir og annað menningartengt efni fyrirbörn. Blaðið kemur út tvisvar á ári og ritstjóri er Helga Ferdinandsdóttir. Hægt er að gerast félagi í IBBY-samtökunum (International Board on Books for Young People) og jafnframt áskrifandi að Börnum og menningu með því að senda póst á bornogmenning@gmail.com.
1. september 2011
Þrjár íslenskar bækur tilnefndar á Heiðurslista IBBY
Barnabókmenntasamtökin IBBY á Íslandi hafa valið þrjár bækur á Heiðurslista alþjóðlegu IBBY samtakanna. Heiðurslistinn er birtur annað hvert ár og fá bækurnar á honum mikla alþjóðlega kynningu, bæði á heimsþingi IBBY sem næst verður haldið í Lundúnaborg í september 2012 og á farandsýningu bóka sem ferðast um allan heim í tvö ár.
- Í flokki frumsaminna skáldverka var tilnefnd bókin Þankaganga – Myslobieg eftir Völu Þórsdóttur og Agnieszku Nowak.
- Í flokki myndabóka var tilnefnd bókin Arngrímur apaskott og hrafninn eftir Kristínu Arngrímsdóttur.
- Í flokki þýðinga var tilnefnd bókin Húsið á bangsahorni eftir A. A. Milne í þýðingu Guðmundar Andra Thorssonar.
Sjá nánar hér um fv. tilnefningar á Heiðurslista IBBY.
12. maí 2011
Vorvindar afhentir á sunnudaginn
Hin árlegu Vorvindaverðlaun verða afhent í Gunnarshúsi við Dyngjuveg klukkan 14:00 sunnudaginn 15. maí. Allir eru velkomnir, og aðgangur ókeypis. Veitingar í boði IBBY.
2. apríl 2011
Ragnheiður Gestsdóttir hlýtur Sögustein
Bókmenntaverðlaun IBBY á Íslandi1 afhent á degi barnabókarinnar
Sögusteinn, barnabókaverðlaun IBBY á Íslandi, voru afhent í fjórða sinn í dag 2. apríl, á alþjóðlegum degi barnabókarinnar. Upphæð verðlaunanna er 500 þúsund krónur en þau eru veitt rithöfundi, myndlistarmanni eða þýðanda sem með höfundarverki sínu hefur auðgað íslenskar barnabókmenntir.
Var það einróma álit valnefndar, sem skipuð var Önnu Heiðu Pálsdóttur,
bókmenntafræðingi, Ármanni Jakobssyni, bókmenntafræðingi og Rögnu
Sigurðardóttur, myndlistarkonu og rithöfundi, að Ragnheiður Gestsdóttir skyldi hljóta verðlaunin. Í greinargerð valnefndar segir meðal annars:
Dómnefndin telur að Ragnheiður Gestsdóttir hafi með skáldsögum sínum, myndskreytingum, léttlestrarefni, endursögðum ævintýrum, söngvasöfnum og textasöfnum og fleiru, lagt fram mjög mikilvægan skerf til íslenskra
barnabókmennta. Verkin hennar spanna allt frá fyrstu sporum barnsins inn í ævintýraheim bókmenntanna með vísum, söngvum og litlum ævintýrum, alla leið til unglingsáranna með tilheyrandi vandamálum, þroska og uppgötvunar á hlutverki einstaklingsins í lífinu.
Afhending verðlaunanna var lokahnykkur hátíðahalda IBBY á Íslandi vegna dags barnabókarinnar, en sl. fimmtudag, 31. mars, stóð félagið fyrir sögustund 42.000 grunnskólabarna á aldrinum 6-16 ára í einu. Þá var ný íslensk smásaga eftir Kristínu Helgu Gunnarsdóttur, síðasta Sögusteinshafa, lesin fyrir alla grunnskólanema á Íslandi og var henni samtímis útvarpað á Rás 1.
Sögusteinn var fyrst afhentur árið 2007. Áður hafa Sigrún Eldjárn, Kristín Steinsdóttir og Kristín Helga Gunnarsdóttir fengið Sögustein IBBY.
Nánari upplýsingar veitir Arndís Þórarinsdóttir, formaður IBBY á Íslandi
31. mars 2011
Samlestur smásögu víðs vegar um Ísland
Fimmtudaginn 31. mars kl. 9:45 verður smásagan „Hörpuslag“ eftir Kristínu Helgu Gunnarsdóttur frumflutt fyrir ríflega 42.000 grunnskólanema í einu, og lesin um leið á Rás 1. Kristín Helga samdi söguna að beiðni IBBY á Íslandi til að halda upp á dag barnabókarinnar 2011 og á hún að höfða til grunnskólanemenda á aldrinum 6-16 ára.
Nánari upplýsingar gefur Arndís Þórarinsdóttir í síma 897 2772 eða um netfangið arndis.thorarinsdottir (hjá) gmail.com
1. mars 2011
Glæsileg ráðstefna í Gerðubergi
Árleg ráðstefna um barna- og unglingabókmenntir verður haldin í Gerðubergi laugardaginn 5. mars. Í ár verður fjallað um stelpu- og strákabækur. Er slík flokkun réttlætanleg og hvernig er hún til komin? Hvernig bækur eru í boði fyrir kynin og hve mikil áhrif hefur flokkunin á lesendur?
Dagskrá:
Þórdís Gísladóttir, íslenskufræðingur, þýðandi og skáld:
Stelpu- og strákabækur; merkimiðar á bókmenntum fyrir unga lesendur.
Brynhildur Heiðar- og Ómarsdóttir, bókmenntafræðingur:
Hetjur í heimi ævintýranna.
Þorvaldur Þorsteinsson, rithöfundur og myndlistarmaður:
Strikamerking stráka og marktækni tegundartenginga (Gordon og Clark 1956).
Fundarstjóri verður Einar Ólafsson, bókavörður og skáld. Ráðstefnan er haldin í samvinnu við Borgarbókasafn Reykjavíkur, Rithöfundasamband Íslands - Síung, Skólasafnamiðstöð Reykjavíkur, Félag fagfólks á skólasöfnum og Upplýsingu – Félag bókasafns- og upplýsingafræða. Í hléi geta ráðstefnugestir keypt léttar veitingar hjá Gallerý fiski
Hér má sjá plakat til að prenta út.
Smelltu á myndina til að hlaða niður plakati og prenta út.
4. nóvember 2010
Bókakaffi á þriðjudag
Til að fagna endurútgáfu Halastjörnunnar eftir Tove Jansson blæs IBBY á Íslandi til umræðukvölds á Súfistanum í Reykjavík þriðjudagskvöldið 9. október kl. 20. Þar munu valinkunnir múmínaðdáendur fjalla um íbúa Múmíndals og ævintýri þeirra.
Erna Erlingsdóttir flytur erindið Seint í nóvember. Síðasta múmínbókin, fjarvera og ferðalög.
Stefán Pálsson flytur erindið Múmínsnáðinn, Kattholtsstrákurinn, Erlendur lögregluforingi & Sir Edmund Halley,
Dagný Kristjánsdóttir flytur erindið Múmínálfarnir og hamskiptin.
Sérstakur gestur frá múmínvinunum í borgarstjórn verður Óttarr Ólafur Proppé.
Allir eru velkomnir og aðgangur endurgjaldslaus.
5. september 2010
Málþing um myndabækur á föstudaginn
Föstudaginn 10. september nk. frá kl. 14-17 verður haldið málþing um myndabækur í Norræna húsinu. Viðfangsefnin eru spennandi og eflaust mun marga langa til að hlýða á þessa áhugaverðu fyrirlestra.
Dagskrá:
14.00-14.30: Dr. Elina Druker, Stokkhólmsháskóla: Recent trends in Nordic Picture Books.
14.30-15.00: Kristín Ragna Gunnarsdóttir, teiknari: The relationship between words & pictures in Icelandic picture books. Do the pictures stand a chance?
15:00-15.30: Dr. Sirke Happonen, Helsinkiháskóla: The Dancing Moominvalley: A Choreographic View on Tove Jansson’s Art and Literature.
15:30-16.00: Þórarinn Leifsson rithöfundur og myndskreytir: What does a Cannibal and a Librarian have in common with a Street Painter?
Málþingið fer fram á ensku. Að loknum fyrirlestrum verða pallborðsumræður um tengsl texta og myndskreytinga undir stjórn Ragnheiðar Gestsdóttur. Að málþinginu loknu verður gestum boðið upp á léttar veitingar. Aðgangur er ókeypis og öllum heimill en fólk er beðið að tilkynna þátttöku til verkefnisstjóra á netfangið thordisg@gmail.com eða thordis@nordice.is
Nánari upplýsingar á síðu Mýrinnar.
Gunnarshús við Dyngjuveg. Rithöfundasamband Íslands hefur góðfúslega veitt IBBY á Íslandi leyfi til þess að halda aðalfundinn í þessu ágæta húsi.
17. maí 2010
Aðalfundur IBBY á Íslandi
Aðalfundur IBBY verður haldinn fimmtudaginn 27. maí kl. 17.30 í Gunnarshúsi, Dyngjuvegi 8 í Reykjavík.
Dagskrá:
Skýrsla formanns
Skýrsla gjaldkera
Stjórnarkjör
Allir félagar Ibby eru velkomnir á fundinn.
16. maí 2010
Viðurkenningar IBBY á Íslandi
Í dag hélt IBBY á Íslandi Vorvindahátíð í Gunnarshúsi þar sem veittar voru fjórar viðurkenningar fyrir gott framlagt til barnamenningar á Íslandi.
F.v. Halldór Baldursson, Iðunn Steinsdóttir, Guðrún Dís Jónatansdóttir, framkvæmdastjóri Gerðubergs, Kristín Arngrímsdóttir ásamt dótturdóttur sinni.
16. maí 2010
Viðurkenningar IBBY á Íslandi
Í dag hélt IBBY á Íslandi Vorvindahátíð í Gunnarshúsi þar sem veittar voru fjórar viðurkenningar fyrir gott framlagt til barnamenningar á Íslandi.
Eftirtalin hlutu viðurkenningar:
Halldór Baldursson fyrir myndskreytingar á barnabókum
Iðunn Steinsdóttir fyrir rithöfundaferil
Kristín Arngrímsdóttir fyrir bók sína Arngrímur apaskott og fiðlan
Menningarmiðstöðin Gerðuberg fyrir öflugt menningarstarf fyrir börn
IBBY á Íslandi hefur veitt viðurkenningar fyrir framlag til barnamenningar allt frá árinu 1987 og hafa næstum sjötíu aðilar hlotið slíka viðurkenningu.
20. apríl 2010
Lesandi inn á hvert heimili
Lestrarhvatningarbæklingurinn Lesandinn er gefinn út af Ibby á Íslandi í tilefni af Viku bókarinnar með stuðningi frá Bókmenntasjóði og Félagi íslenskra bókaútgefenda.
Ritstjóri er Guðlaug Richter. Bæklingnum var dreift á hvert heimili á landinu í því skyni að hvetja landsmenn til að skapa góðan lesanda. Hægt er að nálgast bæklinginn hér á PDF-formi (1,7 Mb).
20. apríl 2010
Dagskrá í Borgarbókasafni sumardaginn fyrsta
Í tilefni barnamenningarhátíðar verður mikið um að vera um alla Reykjavíkurborg á næstu dögum. Fimmtudaginn 22. apríl, á sumardaginn fyrsta, verður t.d. dagskrá á Borgarbókasafninu
frá kl. 14:00-17:00. Þar verða m.a. listasmiðja og afhent bókaverðlaun barnanna. Sjá nánar á vef Borgarbókasafnsins.
1. apríl 2010
Vorhefti Barna og menningar 2010 er komið út
Meðal efnis í blaðinu má nefna greinar eftir safnkennara um barnastarf í Árbæjarsafninu og Þjóðminjasafninu, umfjöllun um barnamenningarhús eftir Eðvald Einar Stefánsson, og í tilefni þess að sextíu og fimm ár eru síðan Múmínsnáðinn og mamma hans birtust fyrst á bók fjallar Þórdís Gísladóttir um Halastjörnuna eftir Tove Jansson. Þá skrifa Brynja Baldursdóttir, Guðrún Elsa Bragadóttir, Maríanna Clara Lúthersdóttir, Hermann Stefánsson, Þorgerður E. Sigurðardóttir og Arndís Þórarinsdóttir um nýlegar bækur og barnaleikrit sem nú eru sýnd á fjölum leikhúsanna auk þess sem ýmislegt fleira áhugavert efni sem tengist barnamenningu á líðandi stund má finna í blaðinu.
IBBY á Íslandi hefur gefið Börn og menningu út vor og haust um árabil. Blaðið er alþýðlegt fræðirit og eina íslenska tímaritið sem tekur eingöngu til umfjöllunar menningartengt efni fyrir börn. Ritstjóri er Þórdís Gísladóttir og hægt er að panta áskrift með því að senda línu á netfangið bornogmenning (hjá) gmail.com. Blaðið verður sent heim til félaga IBBY á Íslandi á næstu dögum.
18. mars 2010
10 hepppnir vinningshafar!
Dregið hefur verið í Fíusólar-leiknum. Nöfn þeirra sem voru með öll svörin rétt, eða tæplega þúsund börn, voru sett í pott og nöfn tíu vinningshafa dregin úr honum. Þau heppnu eru:
Leikhúsmiðar fyrir fjóra á Fíusól í Þjóðleikhúsinu:
Bríet Emma Gísladóttir
Logafold 35, 112 Reykjavík
Daníela Stefánsdóttir
Heinabergi 23, 815 Þorlákshöfn
Elísabet Lilja Ísleifstótir
Hléskógar 5, 109 Reykjavík
Vanessa Þóra Posch
Stóragerði 20, 108 Reykjavík
Þórdís Elín Egilsdóttir
Hjarðarlandi, 801 Selfoss
Bók eftir Kristínu Helgu Gunnarsdóttur:
Gabríela Rós Guðmundsdóttir
Hólavöllum 3, 240 Grindavík
Guðný Árnadóttir
Kirkjubraut 21, 780 Höfn
María Rún Halldórsdóttir
Björtusalir 8, 203 Kópavogur
Ousman Alexander Jallow
Dalbarði 6, 735 Eskifjörður
Sigurður Aron Björnsson
Hólabraut 11, 545 Skagaströnd
Gjafabréf í Þjóðleikhúsið eða árituð bók hafa þegar verið send til vinningshafa. Ibby á Íslandi óskar þessum tíu heppnu krökkum innilega til hamingju með verðlaunin!
1. mars 2010
Fíusólar leiknum lokið
Nú er spurningaleiknum um Fíusólar-bækurnar lokið. Alls tóku rúmlega 3.500 börn þátt í leiknum, en ekki voru allir með svörin rétt. Verið er að vinna úr svörunum og vinningshöfum verður tilkynnt um verðlaunin þann 15. mars. Eins verða nöfn vinningshafa birt hér á síðunni.
29. janúar 2010
Dimmalimm verðlaunin afhent
Ragnheiður Gestsdóttir hlaut Dimmalimm – Íslensku myndskreytiverðlaunin 2009 sem afhent voru við hátíðlega athöfn í Gerðubergi þann 19. janúar sl. Í dómnefndinni voru Kalman le Sage de Fontenay grafískur hönnuður, sem er fulltrúi Myndstefs, Aðalsteinn Ingólfsson, sem fulltrúi Gerðubergs og Bryndís Loftsdóttir, bóksali, sem er fulltrúi Eymundsson.
Þetta er í áttunda sinn sem verðlaunin eru veitt en áður hafa eftirfarandi listamenn veitt verðlaununum viðtöku: Áslaug Jónsdóttir, Halla Sólveig Þorgeirsdóttir, Brian Pilkington, Björk Bjarkadóttir, Sigrún Eldjárn og Kristín Ragna Gunnarsdóttir.
Ragnheiður Gestsdóttir fékk, auk viðurkenningarinnar og blóma, verðlaunafé upp á 450.000 kr. Bókin er gefin út hjá Forlaginu. Sjá nánar á síðu Gerðubergs.
5. nóvember 2009
Börn og menning – hausthefti 2009
Hausthefti Barna og menningar er komið út og verður sent til félaga í Ibby á Íslandi á næstu dögum. Meðal efnis má nefna að Þórdís Gísladóttir fjallar um fjöldaframleiddar eftirprentanir af grátandi börnum, Ármann Jakobsson skrifar grein um bók J.R.R. Tolkiens, Gvendur bóndi á Svínafelli, sem var þýdd á íslensku fyrir þremur áratugum, bækurnar vinsælu um Fíusól eru til umfjöllunar í grein eftir Þorgerði E. Sigurðardóttur og umsjónarmenn Leynifélagsins, sem er barnaþáttur á dagskrá Rásar 1 hjá RÚV, skrifa grein um dagskrárgerð þáttarins.
Þá eru í Börnum og menningu greinar um þrjár nýlega þýddar barna- og unglingabækur; Erla Elíasdóttir fjallar um hinn sígilda Bangsímon eftir A.A.Milne, Ingólfur Gíslason um Doktor Proktor og prumpuduftið eftir Jo Nesbø og Helga Ferdinandsdóttir um Göngin eftir Roderick Gordon og Brian Williams.
Börn og menning kemur út tvisvar á ári en það er eina íslenska tímaritið sem tekur eingöngu til umfjöllunar menningartengt efni fyrir börn. Blaðið er gefið út af IBBY á Íslandi, sem er félagsskapur áhugafólks sem vill efla barnamenningu.
Ritstjóri Barna og menningar er Þórdís Gísladóttir. Beiðni um áskrift má senda á bornogmenning (hjá) gmail.com.
23. sept. 2009
Þrír tilnefndir á Heiðurslista IBBY
Stjórn IBBY á Íslandi hefur ákveðið að heiðra þrjá listamenn með því að tilnefna verk þeirra á Heiðurslista IBBY-samtakanna 2010. Í flokki myndlistar: Björk Bjarkadóttir fyrir Allra fyrsti atlasinn minn. Í flokki frumsaminna bóka: Kristín Helga Gunnarsdóttir fyrir Draugaslóð. Í flokki þýðinga: Rúnar Helga Vignisson fyrir Göngin.
Verkin sem tilnefnd eru verða kynnt á heimsþingi IBBY sem haldið verður í Santiago De Compostela á Spáni 8.-12. september 2010. Allar bækur sem tilnefndar eru á Heiðurslista IBBY eru hafðar til sýnis á heimsþinginu auk þess sem þær fara á farandsýningu um víða veröld að þinginu loknu. Þema IBBY-þingsins 2010 er „Strength of Minorities“ og er það opið öllu áhugafólki um barnabókmenntir. Sjá nánar um þingið hér.
Kynningareintök af bókum sem IBBY á Íslandi bárust vegna vals í Heiðurslistann verða gefin Kvennaathvarfinu.
7. júní 2009
Nordisk blad er komið út
Í ár var röðin komin að Íslandi að sjá um Nordisk blad. Vegna ástandsins í fjármálum var ákveðið að gefa blaðið eingöngu út í PDF-formi en þá geta félagar norrænu IBBY-deildanna skoðað blaðið á Netinu. Kosturinn við útgáfu af þessum toga er einnig sá að hver sem er, hvar sem er í heiminum, getur skoðað blaðið og lesið greinarnar og það er von okkar að með þessu fáum við aukna útbreiðslu.
Kápumyndina gerði Halldór Baldursson af sinni alkunnu snilld. Anna Heiða Pálsdóttir ritstýrði blaðinu og tók einnig að sér hönnun þess, uppsetningu og útgáfu. Smelltu hér til að skoða blaðið í PDF-formi (5,3 Mb).
1. júní 2009
Langar þig á heimsþingið 2010?
Næsta heimsþing IBBY verður haldið 9.-12. september í Santiago de Compostela á Spáni og ljóst er að margir félagar IBBY á Íslandi líti þann stað hýru auga. Skráning á þingið er þegar hafin á síðu heimsþingsins 2010 (sjá hér) og einnig er auglýst eftir fólki sem vill flytja fyrirlestur á þinginu.
Við viljum hvetja sem flesta til þess að dusta rykið af tölvunni og senda inn á heimsþingið tillögu að fyrirlestri frá Íslandi en þema þingsins á reyndar mjög vel við Ísland: Máttur minnihlutahópa („The Strength of Minorities"). Umræðuefnin eru sex (á ensku):
- „Children’s and young people’s literature: a minority area within the literature arena“
- „Children’s and young people’s literature in minority languages: from difference to survival“ (þetta á nú mjög vel við Ísland)
- „Readers in a minority situation“ (sérstaklega hvað varðar fötluð börn eða börn með sérþarfir)
- „A readership bereft of childhood.“ (Til dæmis börn sem ekki hafa haft aðgang að bókum, misnotuð börn og fátæk börn).
- „I am a reading girl, you are a reading boy...“ (Þarf að fást við kynjahlutverk í barnabókum? Hvað með kynhneigð o.fl.?)
- „Globalizing diversity and tolerance through children’s books.“
Sjá nánar um hvert þessarra efna á síðu heimsþingsins. Athugið að ef þið skráið ykkur á þingið fyrir þann 30. september 2009 er veittur 20% afsláttur. Nánar um skráningu og verð hér.
18. maí 2009
Fjórir hlutu Vorvinda-viðurkenningu IBBY á Íslandi
Sunnudaginn 17. maí veitti IBBY á Íslandi þrjár Vorvinda-viðurkenningar í Gunnarshúsi við Dyngjuveg. Allt frá árinu 1987 hefur félagið veitt einstaklingum og stofnunum viðurkenningar á vorin fyrir framlag til barnamenningar á Íslandi.
Í ár hlutu fjórir einstaklingar viðurkenninguna, þau Jónína Leósdóttir, Brynhildur Björnsdóttir, Kristín Eva Þórhallsdóttir og Halldór Ásgrímur Elvarsson.
Jónína Leósdóttir fékk Vorvinda-viðurkenningu fyrir unglingabækurnar Kossar og ólífur (2007) og Svart og hvítt (2008). Í þessum tveimur bókum er sögð þroskasaga Önnu, unglingsstúlku frá Vík í Mýrdal,sem dvelur sumarlangt í Brighton á Englandi. Kossar og ólífur hlaut nokkrar athygli og lof fyrir að vera fyrsta íslenska unglingabókin sem teflir fram samkynhneigðri söguhetju. Þessar tvær bækur Jónínu prýða reyndar margir kostir sem einkenna góðar unglingabækur. Þær eru mjög vel skrifaðar, frásögnin er fjörleg, atburðarásin hröð og full af dramatískum uppákomum.
Útvarpsþátturinn Leynifélagið er tæplega tveggja ára gamall,en honum stýra Brynhildur Björnsdóttir og Kristín Eva Þórhallsdóttir. Markhópur þáttarins sem er á Rás eitt hjá RÚV eru börn á aldrinum 6-10 ára.Hann er á dagskrá fjórum sinnum í viku kl. 20.00 á kvöldin. Umfjöllunarefni þáttanna getur verið af ýmsum toga, t.d. óleystar ráðgátur, dýr sem heita undarlegum nöfnum og margt fleira.Sjónvarpsþættir og bíómyndir og tölvuleikir eru mjög fyrirferðamiklir í lífi barna í dag. Meðan myndir örva sjónskynjun örvar útvarpið ímyndunaraflið og gott ímyndunarafl er gulls ígildi.
Þriðja viðurkenningin var veitt Halldóri Á. Elvarssyni fyrir bækurnar Stafróf dýranna og Teljum dýr: 1, 2 og 3. Halldór er grafískur hönnuður og eru bæði myndir og texti eftir hann. Þetta eru fallegar og hugvitsamlegar bækur til að sýna fróðleiksfúsum börnum sem vilja læra um stafina og kynnast því sem bækur hafa að geyma - og svo má ekki gleyma því sem tölurnar búa yfir.
14. maí 2009
Aðalfundur IBBY á Íslandi
Nú verður aðalfundur IBBY á Íslandi haldinn miðvikudaginn 27. maí í veitingahúsinu Lækjarbrekku kl. 17.30. Að sjálfsögðu eru allir félagar hvattir til að mæta á aðalfundinn til að hitta aðra félaga, greiða atkvæði, og þiggja kaffiveitingar.
13. maí 2009
Vorvindar afhentir á sunnudaginn í Gunnarshúsi
Hinar árlegu Vorvinda-viðurkenningar IBBY á Íslandi verða afhentar við hátíðlega athöfn í Gunnarshúsi (húsi Rithöfundasambandsins, Dyngjuvegi 8 í Reykjavík) sunnudaginn 17. maí kl. 15:00.
Allir félagar IBBY á Íslandi, ásamt gestum, eru hjartanlega velkomnir og við munum taka lagið um Vorvindana að venju.
18. apríl 2009
Fyrra hefti Barna og menningar árið 2009 er nýkomið út fullt af áhugaverðu efni.
Lana Kolbrún Eddudóttur fjallar um teikninmyndasögupersónuna Tinna og belgíska blaðamanninn Hergé, höfund Tinnabókanna og Arndís Þórarinsdóttir skrifar um Ljósaskipta-bækur Stephenie Meyer, sem hafa slegið í gegn hjá lesendum á breiðu aldursbili, en fyrsta bókin í þeirri ritröð kom út á íslensku í vetur.
Þorgerður E. Sigurðardóttir fjallar vítt um bækur sem höfða jafnt til ungra sem eldri lesenda og eru jafnvel markaðssettar með ólíkum hætti fyrir ólíka aldurshópa og Maríanna Clara Lúthersdóttir skrifar um bókina Strákurinn í röndóttu náttfötunum sem tilheyrir flokki helfararbókmennta.
Þá er í Börnum og menningu fjallað um nýlegar íslenskar barnabækur; Garðinn eftir Gerði Kristnýju, Maxímús músíkús heimsækir hljómsveitina eftir Hallfríði Ólafsdóttur og Þórarinn Má Baldursson og Þór í Heljargreipum eftir Friðrik Erlingsson. Einnig er sagt frá ljósmyndasýningu í Þjóðminjasafninu og leiksýningunni Kardemommubænum í Þjóðleikhúsinu.
Ritstjóri Barna og menningar er Þórdís Gísladóttir. Blaðið kemur út vor og haust og áskrift fyrir einstaklinga kostar 2.800 krónur á ári. Hægt er að gerast áskrifandi með því að senda póst á netfangið bornogmenning@gmail.com.
Félagar í IBBY á Íslandi fá blaðið heimsent fljótlega.
Frú Vigdís Finnbogadóttir afhendir Kristínu Helgu Gunnarsdóttur
Sögusteininn í Borgarbókasafninu í gær.
3. apríl 2009
Kristín Helga Gunnarsdóttir hlýtur Sögustein 2009
Sögusteinn, barnabókaverðlaun IBBY á Íslandi, voru afhent í þriðja sinn í gær 2. apríl, á alþjóðlegum degi barnabókarinnar. Upphæð verðlaunanna er 500 þúsund krónur en þau eru veitt rithöfundi, myndlistarmanni eða þýðanda sem með höfundarverki sínu hefur auðgað íslenskar barnabókmenntir.
Var það einróma álit valnefndar, sem skipuð er Önnu Heiðu Pálsdóttur, bókmenntafræðingi, Ármanni Jakobssyni, bókmenntafræðingi og Rögnu Sigurðardóttur, myndlistarkonu og rithöfundi, að Kristín Helga Gunnarsdóttir skyldi hljóta verðlaunin að þessu sinni. Í greinargerð valnefndar segir meðal annars:
„Á þessum tólf árum sem rithöfundarferill Kristínar Helgu spannar hefur hún skrifað hátt á annan tug bóka, að minnsta kosti eina á ári og stundum tvær. Oft hafa mikil afköst vera talin skerða gæðin: að rithöfundur gefi sér ekki tíma til að vanda til verka. Kristín Helga hefur margsannað að það er bara goðsögn.
Binna, Hekla, Mói hrekkjusvín, Silfurberg-þríburarnir, og síðast en ekki síst Fíasól, eru persónur sem barnið í okkar húsi og barnabarnið í næsta húsi hafa alist upp með, svipað og eldri kynslóðin á Íslandi í dag ólst upp með Línu Langsokk og Önnu í Grænuhlíð. Mjög sennilega munu þau tala um Fíusól með sérstakan glampa í augunum eftir tíu, tuttugu eða þrjátíu ár. Í Fíusól hefur Kristín Helga skapað persónu sem er íslensk, sjálfstæð, skapandi og frumleg en um leið afar trúverðug.
Undirliggjandi boðskapur bóka Kristínar Helgu er krafa um að hugsa sjálfstætt og að vera góð og heilsteypt manneskja, en þessi boðskapur kemur hvergi fram á of opinskáan hátt. Kristín Helga hefur eingöngu skrifað barnabækur og hún hefur sannað að góður barnabókahöfundur getur skipað sér í fremstu röð íslenskra rithöfunda.“
Frú Vigdís Finnbogadóttir afhenti Kristínu Helgu verðlaunin við athöfn sem haldin var á vegum IBBY og Borgarbókasafnsins í Grófarsal, á 6. hæð í Grófarhúsinu við Tryggvagötu. Auk verðlaunafjárins hlaut Kristín Helga til eignar fallegan verðlaunagrip sem hannaður var af Önnu Þóru Árnadóttur, grafískum hönnuði. Aðrir handhafar Sögusteins eru Sigrún Eldjárn og Kristín Steinsdóttir.
16. mars 2009
BÓKAORMAELDI - Gerðubergsráðstefnan
Á laugardaginn, 21. mars, verður 11. barna- og unglingabókaráðstefnuna haldin í Gerðubergi í samstarfi við Borgarbókasafnið, IBBY á Íslandi, Síung, Skólasafnamiðstöð Reykjavíkur, Upplýsingu - Félag bókasafns- og upplýsingafræða og Félag fagfólks á skólasöfnum. Hún stendur frá kl. 10:30 til 13:15. Í hléi geta ráðstefnugestir keypt girnilega samloku, kaffi eða gos fyrir kr. 750.- hjá Gallerý fiski sem sér um veitingareksturinn í Gerðubergi.
Dagskrá:
Halla Kjartansdóttir: Að verða læs eða lens
Guðlaug Richter: Hvernig glæðum við áhuga barna á lestri?
Ingibjörg Baldursdóttir: Lestrarkveikjur
Brynhildur Þórarinsdóttir: Lestrarhestamót(un)
– Gæðingaskeið, slaktaumatölt og fleiri lestraríþróttir
Fundarstjóri: Silja Aðalsteinsdóttir
Ókeypis aðgangur! Sjá nánari upplýsingar á vef Gerðubergs.
19. febrúar 2009
Bókakaffi fimmtudaginn 26. febrúar
Nú er kominn tími til að rífa sig upp í skammdeginu, skella sér á kaffihús og hlusta á virkilega áhugaverða fyrirlestra með öðru áhugafólki um barnamenningu og barnabókmenntir.
Bókakaffið verður haldið fimmtudaginn 26. febrúar kl. 20:00 á Laugavegi 18 (í Te og Kaffi, bókabúð Máls og menningar). Yfirskriftin er: Barnabækur fyrir fullorðna eða fullorðinsbækur fyrir börn. Margir hafa velt því fyrir sér hvort mörk unglingabóka og bóka fyrir fullorðna séu orðin óljósari en áður - og því verður áhugavert að heyra hvað fólki finnst um það mál.
- Þorgerður E. Sigurðardóttir: Upp og niður kanínuholuna: Um bækur fyrir alla.
- Arndís Þórarinsdóttir: Ófreskjan tamin; um Ljósaskipti eftir Stephenie Meyer.
- Maríanna Clara Lúthersdóttir: Saklaust ævintýri? Strákurinn í röndóttu náttfötunum sem dæmisaga úr helförinni.
Eins og alltaf er ókeypis aðgangur og allir velkomnir. Til að opna og prenta út auglýsingu (PDF-skjal í A4 stærð), smelltu hér.
22. janúar 2009
Sigrún Eldjárn les úr bókum sínum í Borgarbókasafni
Sunnudagar eru barnadagar aðalsafni Borgarbókasafns, Tryggvagötu 15, og næsta sunnudag 25. janúar kl. 15:00 les Sigrún Eldjárn upp úr tveimur af bókunum sínum um Kugg, Draugagangi og Þorrablóti. Allir velkomnir!
16. janúar 2009
Merktu við 26. febrúar á dagatalinu þínu
Fimmtudaginn 26. febrúar kl. 20:00 verður bókakaffi IBBY á Íslandi haldið á veitingahúsinu Te og kaffi (áður Súfistinn) á 2. hæð í bókaverslun Máls og menningar að Laugavegi 18. Þrír áhugaverðir fyrirlestrar verða í boði (nánar auglýst síðar). Ókeypis aðgangur eins og alltaf, og allir velkomnir.
16. janúar 2009
Opnun sýningar og afhending verðlauna í Gerðubergi
Á morgun kl. 15:00 verður hin árlega sýning á myndskreytingum í íslenskum barnabókum sem nefnist „Þetta vilja börnin sjá" opnuð í Gerðubergi (við Austurberg) í Breiðholti. Að þessu sinni taka 24 myndskreytar þátt í sýningunni. Dimmalimm verðlaunin verða veitt fyrir bestu myndskreytingar í íslenskum barnabókum 2008 við opnun sýningarinnar.
Dimmalimm og Hattur, úr leikritinu Hattur og fattur, mun að sjálfsögðu mæta á svæðið og skemmta bæði börnum og fullorðnum! Sjá nánar á vefsíðu Gerðubergs.
14. janúar 2009
Slönguspilið
Eitt af helstu verkefnum IBBY er að verðlauna góða rithöfunda og fólk sem vinnur að barnamenningu á ýmsan hátt. Sl. tvö ár hefur IBBY veitt Sögusteininn til rithöfundar sem hefur glæstan feril að baki og er enn að vinna góðar bækur fyrir íslensk börn. Árið 2007 fékk Sigrún Eldjárn Sögusteininn og í kjölfarið gaf IBBY út dagatal með verkum hennar sem sent var á alla skóla á landinu. Á sl. ári hlaut Kristín Steinsdóttir Sögusteininn og af því tilefni gáfum við út plakat með verkum hennar og sendum á öll skólabókasöfn á landinu - endurgjaldslaust, að sjálfsögðu. Hér fyrir neðan er mynd af plakatinu, sem jafnframt er hægt að nota sem spil. Þú getur hlaðið niður plakatinu, framhlið og bakhlið (3 Mb) með því að smella hér.
4. desember 2008
Upplestur úr barnabókum
Það verður jólalegt í aðalsafni Borgarbókasafns næsta sunnudag, þann 7/12 kl.15:00. SÍUNG (Samtök íslenskra
barna- og unglingabókahöfunda) kynna nýjar bækur. Þeir höfundar sem lesa úr verkum sínum eru:
Iðunn Steinsdóttir – Snuðra og Tuðra í jólaskapi,
Áslaug Jónsdóttir – Skrímslapest,
Jónína Leósdóttir – Svart og hvítt.
Kristín Helga Gunnarsdóttir – Fíasól er flottust,
Brynhildur Þórarinsdóttir – Nonni og Selma, fjör í fríinu,
Þorgrímur Þráinsson – Þriðji ísbjörninn,
Bergljót Arnalds – Stafakrlarnir,
Sigrún Eldjárn – Eyja Sólfuglsins og
Bergljót Arnalds – Stafakarlarnir
Allir velkomnir
25. nóvember 2008
Börn og menning 2 tbl. 2008
Tímaritið Börn og menning, 2. tbl., 23. árg. 2008, er nýkomið út og ætti að berast félagsmönnum IBBY á næstu dögum. Félagar fá einnig sérstakt veggplakat sem gefið var út í tilefni þess að Kristín Steinsdóttir hlaut Sögusteininn 2008 - en plakatið má einnig nota sem skemmtilegt spil.
Meðal fjölbreytts efnis má nefna grein eftir Ármann Jakobsson um vinsælar bækur sem komu fyrst út á fimmta áratug síðustu aldar, greinin ber titilinn „Adda trúlofast og Beverly Gray leitar að gulli: Í árdaga unglingabókanna á Íslandi.“ Anna Þorbjörg Ingólfsdóttir skrifar um svokallaðar „skvísusögur“ og heitir grein hennar „Dramadrottningar með beygluð og brotin hjörtu.“ Guðlaug Richter fjallar um nýjar bækur Jónínu Leósdóttur Kossar og ólífur og Svart og hvítt og ber grein hennar yfirskriftina „Hinsegin unglingabækur um sanna vináttu,“ og Sigurður Ólafsson skoðar nokkrar bækur Helga Jónssonar og heitir hans innlegg „Metsöluhöfundur barnanna: Afþreyingarbækur fyrir yngri borgara.“
Í blaðinu er einnig grein um bækur Kristínar Steinsdóttur sem gerast á Austurfirði og í Reykjavík og önnur um samkynhneigðar verur í heimi múmínálfa Tove Jansson. Þá er að vanda í Börnum og menningu fjallað um ýmsar nýútkomnar barnabækur.
12. september 2008
Bókmenntahátíðin DRAUGAR ÚTI Í MÝRI
Fjórða alþjóðlega barna- og unglingabókahátíðin sem kennd er við mýrina verður haldin 19.- 23. september undir yfirskriftinni Draugar úti í mýri.
Hátíðin byggist dagskrá með rithöfundum í Norræna húsinu laugardaginn 20. og sunnudaginn 21. september og heimsóknum höfunda í skóla og á bókasöfn 22 og 23. september.
Markmiðið er að hátíðin stuðli að aukinni þekkingu á barna- og unglingabókmenntum og henni er ætlað það hlutverk að auka veg þessarar mikilvægu greinar bókmenntanna hér á landi á komandi árum.
Sú nýbreytni verður á hátíðinni í haust að Garðabær verður sérstakur vinabær hátíðarinnar.
Meðal nýjunga sem bryddað er upp á í tengslum við hátíðina 2008 er smásagnasamkeppni á vegum Forlagsins. Þann 20. september gefur Mál og menning út bókina At og aðrar sögur með úrvali 16 spennandi draugasagna fyrir börn frá 9 ára aldri. Alls bárust 106 sögur í keppnina. Þrír höfundar verða verðlaunaðir sérstaklega fyrir sögur sína. Þau eru Guðmundur Brynjólfsson fyrir söguna At?, Kristín Helga Gunnarsdóttir fyrir söguna Rauð húfa og Iðunn Steinsdóttir fyrir söguna Allra sálna messa. Aðrir íslenskir höfundar sem sérstaklega verður boðið á hátíðina eru Gerður Kristný, Kristín Steinsdóttir og Jón Hjartarson.
Þá taka 8 erlendir höfundar þátt í hátíðinni. Sjá nánar á síðu hátíðarinnar.
20. júlí 2008
Jónína Friðfinnsdóttir er látin
Forystumaður um stofnun IBBY á Íslandi, Jónína Friðfinnsdóttir, lést þann 11. júlí sl. og var jarðsett í kyrrþey þann 17. júlí. Jónína lauk kennaraprófi frá Kennaraskóla Íslands 1963 og BA gráðu í bókasafns- og upplýsingafræði frá HÍ 1983. Jónína sat í stjórn IBBY á Íslandi og var formaður félagsins um árabil. Stjórn félagsins flytur ættingjum Jónínu hjartanlegar samúðarkveðjur og þakkar henni fórnfús störf hennar í þágu félagsins og barnabókmennta á Íslandi.
20. maí 2008
Vorvindar 2008
IBBY á Íslandi afhenti árlegar viðurkenningar fyrir gott framlag til barnamenningar sunnudaginn 18. maí í Gunnarshúsi við Dyngjuveg . Gerður Kristný hlaut viðurkenningu fyrir barnabækur sínar, Mörtu smörtu, Jóladýrin, Land hinna týndu sokka og Ballið á Bessastöðum, sem allt eru vönduð og skemmtileg verk. Marta smarta sló strax í gegn hjá krökkunum sem veittu henni Bókaverðlaun barnanna 2003 og Ballið á Bessastöðum hefur kitlað hláturtaugar jafnt barna sem fullorðinna.
> sjá nánar
20. maí 2008
Börn og menning 1/2008 er komið út
Tímaritið Börn og menning, 1. tbl., 23. árg. 2008, er komið út. Meðal efnis má nefna grein eftir Ragnheiði Gló Gylfadóttur um barnafornleifafræði, Katrín Jakobsdóttir fjallar um Harry Potter-fyrirbærið, Sigríður Pétursdóttir um kvikmyndina Duggholufólkið, Eiríkur Örn Norðdahl skrifar um nýlega endurútgáfu bókar Muggs um negrastrákana tíu, Elva Björk Sverrisdóttir veltir fyrir sér nafngiftum, rifjaðar eru upp deilurnar um bókina Félaga Jesú, fjallað er um óvenjulega myndlistarsýningu blindra og sjónskertra barna og ýmislegt fleira áhugavert má að vanda finna í blaðinu. Kápumynd þessa heftis er eftir Lóu Hlín Hjálmtýsdóttur.
> sjá nánar
20. maí 2008
Kristín Steinsdóttir hlaut Sögustein 2008
Sögusteinn, barnabókaverðlaun IBBY á Íslandi og Glitnis, voru afhent í annað sinn á alþjóðlegum degi barnabókarinnar 2. apríl 2008. Upphæð verðlaunanna er 500.000 kr. en þau eru veitt rithöfundi, myndlistarmanni eða þýðanda sem með höfundarverki sínu hefur auðgað íslenskar barnabókmenntir.
Var það einróma álit valnefndar, sem skipuð var Önnu Heiðu Pálsdóttur, bókmenntafræðingi, Ármanni Jakobssyni, bókmenntafræðingi og Rögnu Sigurðardóttur, myndlistarkonu og rithöfundi, að Kristín Steinsdóttir skyldi hljóta verðlaunin að þessu sinni.
> sjá nánar
3. apríl 2008
Kristín Steinsdóttir hlaut Sögustein 2008
Sögusteinn, barnabókaverðlaun IBBY á Íslandi og Glitnis, voru afhent í annað sinn á alþjóðlegum degi barnabókarinnar 2. apríl 2008. Upphæð verðlaunanna er 500.000 kr. en þau eru veitt rithöfundi, myndlistarmanni eða þýðanda sem með höfundarverki sínu hefur auðgað íslenskar barnabókmenntir.
Var það einróma álit valnefndar, sem skipuð var Önnu Heiðu Pálsdóttur, bókmenntafræðingi, Ármanni Jakobssyni, bókmenntafræðingi og Rögnu Sigurðardóttur, myndlistarkonu og rithöfundi, að Kristín Steinsdóttir skyldi hljóta verðlaunin að þessu sinni.
> sjá nánar
12. mars 2008
Sögubíllinn er farinn af stað
(Frá Borgarbókasafni:) Æringi, sem er litli bróðir bókabílsins Höfðingja, ætlar að heimsækja alla leikskóla Reykjavíkur og bjóða börnunum í sögustund.
Efnt var til samkeppni meðal myndlistarmanna um skreytingar á sögubílinn og bar Brian Pilkington sigur úr býtum. Ævintýralegar myndir hans sem meðal annars sýna tröll, dreka, úlf, grísi og börn prýða nú bílinn.
Verkefnisstjóri sögubílsins, leikkonan María Pálsdóttir, mun ásamt barnabókavörðum Borgarbókasafns skipuleggja ferðir Æringja. Ætlunin er að lesa og segja sögur í bílnum en einnig eru uppi áform um samstarf við einstaklinga og stofnanir. Sögubílsstjórinn auglýsir sérstaklega eftir eldri borgurum sem langar að koma í bílinn og segja þeim yngri frá atburðum eða aðstæðum úr eigin bernsku. Það verður ánægjulegt að brúa kynslóðabilið í sögubílnum. Allar nánari upplýsingar veitir María Pálsdóttir í síma 664 7718, maria.palsdottir@reykjavik.is
9. janúar 2008
Dagur barnabókar - Sögusteinn - Gerðubergsráðstefnan
Félagar í IBBY eru eflaust með þéttsettna dagskrá í vor svo við viljum vekja athygli ykkar tímanlega á nokkrum atburðum. Þetta eru helstu dagsetningar:
- Miðvikudagur 2. apríl: Dagur barnabókarinnar (Sögusteinninn)
- Laugardagur 5. apríl: Ráðstefna um barnabækur í Gerðubergi
Við munum innan bráðar segja nánar frá þessum atburðum en í millitíðinni geta félagar IBBY á Íslandi merkt við þessa daga í dagbókinni sinni.
9. janúar 2008
Skráið ykkur tímanlega á heimsþingið
Heimsþing IBBY hefur sjaldan verið haldið nær okkur, landfræðilega séð, en í haust verður 31. þingið haldið í Kaupmannahöfn. Þema þingsins verður „Stories in History - History in Stories" sem er erfitt að þýða á íslensku öðru vísi en sögur í sögunni og sagan í sögum. Þingið verður haldið dagana 7.-10. september nk. Verndari þingsins er Margrét Danadrottning sem ávallt hefur sýnt mikinn áhuga á barnabókum. Þeir sem skrá sig fyrir þann 1. apríl fá afslátt af ráðstefnugjaldinu. Stjórn IBBY á Íslandi ætlar að fjölmenna og við vonum að sem flestir félagsmenn sjái sér fært að mæta.
> sjá nánar á vef IBBY-samtakanna í Danmörku (á ensku)
8. janúar 2008
Bókaormar verðlaunaðir
Vefurinn Bókaormar BarnUng á vegum Kennaraháskóla Íslands var á meðal verðlaunahafa í keppni Evrópska skólanetsins um eLearning Awards sem afhent voru við hátíðlega athöfn í Brussel 6. desember. Bókaormarnir eru þróaðir af Torfa Hjartarsyni lektor við Kennaraháskóla Íslands og Þorbjörgu St. Þorsteinsdóttur í samvinnu við Davíð Einarsson forritara.
> sjá nánar
30. nóvember 2007
Börn og menning - sérstök áhersla á Astrid Lindgren
Hausthefti 22. árgangs tímaritsins Börn og menning er komið út. Blaðið er gefið út af IBBY á Íslandi tvisvar á ári.
 |
Efni blaðsins er fjölbreytt að vanda. Í tilefni 100 ára fæðingarafmælis Astridar Lindgren nú í nóvember, skrifa Katrín Jakobsdóttir, Erna Erlingsdóttir og Guðrún Lára Pétursdóttir greinar um bækur höfundarins auk þess sem Sigþrúður Gunnarsdóttir segir frá pílagrímsferð á heimaslóðir Astridar.
Í haust eru liðin 150 ár frá fæðingu rithöfundarins og prestsins Jóns Sveinssonar, Nonna, og minnist Björn Bjarnason, ráðherra hans í blaðinu.
> sjá nánar |
20. nóvember 2007
Dimmalimm - Íslensku myndskreytiverðlaunin 2007
Félagar IBBY eru velkomnir á opnun sýningarinnar Þetta vilja börnin sjá! í Gerðubergi laugardaginn 24. nóvember kl. 16.00. Íslensku myndskreytiverðlaunin, sem kennd eru við Dimmalimm, verða veitt fimmtudagskvöldið 6. desember kl. 20.00. Félag íslenskra bókaútgefenda, Myndstef og Penninn standa að verðlaununum ásamt Menningarmiðstöðinni Gerðubergi. Í dómnefnd eru þau Aðalsteinn Ingólfsson, listfræðingur, Kalman le Sage de Fontenay, auglýsingateiknari og Nanna Kristín Magnúsdóttir, leikkona. Verðlaunin voru veitt í fyrsta sinn árið 2002.
> sjá nánar
20. nóvember 2007
Sigrún Eldjárn á Ritþingi Gerðubergs
Sigrún Eldjárn situr fyrir svörum á Ritþingi Gerðubergs 24. nóvember, kl. 13:30-16:00. Stjórnandi þingsins er Sigþrúður Gunnarsdóttir og í hlutverki spyrla eru þau Aðalsteinn Ásberg Sigurðsson og Margrét Tryggvadóttir. Tónlistaratriði: Grímur Hjörleifsson og Kristján Eldjárn Hjörleifsson. Styrktaraðili er Forlagið og allir eru velkomnir.
20. nóvember 2007
Sýning úr söguheimi Sigrúnar Eldjárn
Gerðuberg býður upp á sýningu úr söguheimi Sigrúnar Eldjárn frá
24. nóvember til 13. janúar. Þegar Ritþinginu lýkur kl. 16 verður opnuð sýning þar sem gestir eru boðnir í heimsókn á heimili Málfríðar, sem líklega má teljast með frægari sögupersónum Sigrúnar. S ýningin er fyrir börn og fullorðna á öllum aldri!! Sýningarstjórar: Anik Todd og Una Stígsdóttir. Ókeypis aðgangur er á ritþingið og sýninguna!
8. október 2007
Gott kvöld á Súfistanum - bernskan og óttinn
Bókakaffi verður haldið fimmtudaginn, 11. október, kl. 20.00 á Súfistanum Laugavegi 18. Dagskrá Bókakaffisins tengist sýningu Þjóðleikhússins á barnaleikritinu Gott kvöld eftir Áslaugu Jónsdóttur bókverkakonu. Að auki verður kastljósinu beint að bókum Áslaugar.
- Þórdís Þórðardóttir, lektor í uppeldis- og menntunarfræði, KHÍ, fjallar um það hvað fjögurra og fimm ára börn hafa að segja um barnabækur sem „ gefa kitl í magann “
- Áslaug Jónsdóttir, Helga Arnalds brúðuleikari og Þórhallur Sigurðsson leiksjóri segja frá sköpun leikverksins Gott kvöld frá ýmsum hliðum.
Allir velkomnir meðan húsrúm leyfir.
22. ágúst 2007
Málþing um Guðjón Sveinsson - Höfn 1. september
Laugardaginn 1. september verður haldið málþing um Guðjón Sveinsson, rithöfund á Breiðdalsvík. Blásið er til málþingsins í tilefni þess að Guðjón varð sjötugur fyrr á árinu og á um þessar mundir fjörutíu ára höfundarafmæli. Málþingið er haldið á vegum Fræðaseturs Háskóla Íslands á Höfn og Menningarmiðstöðvar Hornafjarðar. Þingið fer fram í Nýheimum, Litlubrú 2 á Höfn, og hefst kl. 13. Málþingið er öllum opið.
> sjá nánar
21. ágúst 2007
Nordisk blad - á PDF
Félagar í IBBY á Íslandi eru Nordisk blad mjög kunnugir, þar sem blaðið hefur um árabil fylgt með Börnum og menningu einu sinni á ári. Í ár ákváðu norrænu deildirnar að gefa út blaðið í tölvutæku formi til þess að spara útgáfukostnað. Það er þó veglegt að vanda og mikið af áhugaverðu efni er að finna í blaðinu, ásamt enskum úrdrætti.
> sjá nánar
9. júní 2007
Barnamenning - skiptir fagurfæðin máli?
Dagana 25.-18. október verður haldin ráðstefna um barnamenningu á Hótel Örk í Hveragerði. Ráðstefnan, sem haldin er á vegum BIN i Norden, skiptist í tvö þemu: Merking fagurfræði í menningu barna og merking fagurfræði í menningu (fullorðinna) fyrir börn. Aðalfyrirlesarar eru prófessor Jon-Roar Bjørkvold frá Noregi og Suzanne Osten frá Svíþjóð.
> sjá nánar
24. maí 2007
AÐALFUNDUR Í DAG
Munið aðalfundinn í dag! Hann verður haldinn á veitingahúsinu Lækjarbrekku kl. 17:00. Á dagskrá eru venjuleg aðalfundarstörf.
17. maí 2007
Ráðstefna um neyslumenningu barna og unglinga
Vefmeistara hefur borist tilkynning, eða „Call for Papers" vegna ráðstefnu sem verður haldin 24.-25. apríl 2008 í Þrándheimi í Noregi. |
